تجربه مفيده

أول شي باركوا لي اني عرفت انزل صوره في بلوقي

بمساعدة زوجي الحبيب وطبعا كل تكنلوجيا في البلوق من انتاجه

الله يخليه لي ذخر

وصلني هالايميل من صديقتي الغاليه عقب ما شافت معاناتي

مع عيالي الاثنين اللي مشيبين راسي في الاكل

وجربتها معاهم و جابت خوش نتيجه

وحبيت اوصلها لكل من يعاني مثلي

اليهال ( الأطفال ) لهم ساعات ماياكلون الأكل

اللي يتقدم لهم سواءا كان الأكل للريوق او الغدا او العشا

ممكن يكون بسبب عمرهم

لأن سنهم سن صعب التفاهم معاه عن أهميه الأكل المقدم لهم

فنشوفهم يفضلون عليها الحلويات والبطاط والمقالي وغيرها

وممكن يكون رفضهم بسبب عدم اعجابهم بالأكل

من ناحية شكله الغير جاذب

حتى ان نشوف اليهال يرفضون الأكل ابمجرد نظرهم له

حتى من غير ما يتذوقونه

وهم ممكن يكون السبب

عدم سؤالنا للطفل عن اللي يحبه واللي ما يحبه من الأكل

فنشوفهم يرفضون الاكل لعدم استساغهم لطعمه

( تذكروا ان كل شخص له ذوقه الخاص )

فالحل ...ممكن يكون

1
ابتغير اصحونهم ( اطباقهم ) بصحون يديدة
حلوة ومرسومة ابرسومات ( تعجبهم اهم ) مو انتوا

2
اسألوهم عن اللي يحبونه
وحاولوا انكم اتسوونه لهم بين الفترة والثانية
ان كان شي مقبول ومفيد

3
اعرضوا عليهم الاكل ابشكل جاذب يلفت انتباهم
يعني رتبوا الأكل بالصحن ابشكل منظم
من غير حط الاكل ابطريقة اي شي على يمين ويسار الصحن
وهم زينوا لهم الاكل مثل حركات المطاعم
يعني مثلا حطوا فوق اقلاس ( كأس ) عصير البرتقال
قطعة برتقال اصغيره .. وجذي

وهم بعد يكون الاكل بكميه متوسطه بالصحن
يشجعهم عالأكل
وما يحسسهم ان هالاكل فوق قدرتهم
وان عمره ماراح يخلص لو كلا فيه من اليوم لي بعد سنة

4
ان رفض الياهل تناول الوجبة
نطروا عليه اشوي وقدموها له بعد وقت
ولا تضغطون عليه بالاكل غصب وطق وصراخ
هالسوالف تخليه يكره الاكل واللي يوكله بعد
( تذكروا انه اكل مو عذاب )

5
اكلوا معاهم اشوي حتى لو بس جذي
بس طبعا ابصحن منفصل عنهم مو تاكلون اكلهم
جذي بتشجعوهم لأن ممكن الياهل يبي احد معاه وقت الاكل
وفاقد اللي يصاحبه ويشجعه عالاكل

6
نوعوا بأنواع الأكل وقدموا لهم شي يديد
يمكن يعجبهم