لوووويه وعساها على خير يا ربي .....ء
متنا من اللويه يا رب شنو بنلحّق عليه ؟؟ لويه مع اليهال ومدارسهم
ولا لوية الزيارات حق نبارك للشهر ومع هالزحمه الفضيعه
يضيع اليوم وما رحت الا بيتين ... ولا لويتي مع طاقم الخدم الجديد
ولا طلبات" راج" الطباخ اللي ما تخلص ذابحني في رمضان بالمصاريف الزايده
السايق يروح الجمعيه في اليوم خمس مرات او اكثر
وما يخلص من طلباته اللي كل ساعه طالبها لو عندنا مطعم ما خلصت ماجلتنا بهالسرعه الخياليه
حسبي الله عليه عطب ميزانية الشهر... فقررت بعد التوكل على الله اني اروح
الجمعيه بروحي لتسلية الصيام مثل اغلبية الكويتيين
ويا ليتني ما رحت حاشتني مغثات كثيرات خلتني احرم اروح
جمعيات... و جني ذبحتكم بدليات؟؟!!؟؟
المغثه: الابو واقف مع عياله الاثنين بنت وولد اعمارهم على ما اعتقد بين الاربع والست سنوات مو اكثر
قاعدين يترجون الوالد المصون المجرم المينون انه يشتري لهم بفك والاخ ومزاجه المتعكر مع الصيام مو راضي
زادت حنة اليهال وما وعيت الا ذاك الطرااااق على ويه الولد
كسر يكسر ايدك تطق ياهل بو ست سنين طراااااق
حسبي الله عليك سبع التحاسيب
الله لا يوريكم ويه الياهل وويه اخته
انا من الحره قعدت ابجي على منظرهم
اذا مالك خلقهم شحقه تطلعهم ؟؟؟
واااااااي ما تتخيلون شكثر اكره اي احد يطق الياهل طراق
احس انه يهينهم و يجرح كرامتهم
تكدرت وتعكر مزاجي طول اليوم وبس اتذكر ويه الياهل ابجي وابجي
يعني بالنهايه انقلب يومي فيلم هندي
إنما أولادنا بيننا أكبادنا تمشي على الأرض
لو هبت الريح على بعضهم لامتنعت عيني عن الغمض
الله يخليكم حطوا بالكم عليهم ولا تصيرون عنيفين عليهم وطولوا بالكم
واللي ما يقدر يتحمل يهال لا ييبهم وعقب يعقدهم في حياتهم
